Kinondena ng Malacañang at ng August Twenty-One Movement (ATOM) ang naging pahayag ni Robinhood Padilla matapos nitong ihambing ang paggamit ng alyas ng mga bayani sa mga pangalang nakasaad sa resibo ng confidential funds ng Office of the Vice President (OVP).
Ayon kay Palace press officer Claire Castro, malinaw na magkaiba ang konteksto ng dalawang sitwasyon. Aniya, ginamit ng mga bayani ang alyas bilang bahagi ng kanilang pakikibaka para sa kalayaan, samantalang ang mga pangalang nasa resibo ay iniuugnay sa pagbabayad sa mga informant.
Dagdag pa ni Castro, ang mga bayani noon ay tunay na indibidwal, habang nananatiling kuwestiyonable kung ang mga pangalang nasa resibo ay totoo o “ghost” beneficiaries.
Nauna nang iginiit ni Padilla sa pagdinig kaugnay ng impeachment case laban kay Sara Duterte na maging si Benigno Aquino Jr. ay gumamit ng alyas tulad ng “Marcial Bonifacio.”
Gayunman, iginiit ng ATOM na hindi dapat ihambing ang sakripisyo ng mga bayani sa mga usaping may kinalaman sa paggamit ng pondo ng gobyerno. Binigyang-diin ng grupo na ang kasaysayan at ambag ng mga bayani sa kalayaan ng bansa ay dapat igalang at hindi gawing katatawanan.
Nanawagan din ang ilang grupo sa senador na magsagawa ng masusing pananaliksik at maging maingat sa mga pahayag na may kaugnayan sa kasaysayan.















Leave a Reply